قسمت وجبة فطارك النهاردة ؟
عشان وجبة الفطار هي الوجبة الأساسية في رمضان و مهمة لصحتك فا سلامتك هتعرفك إزاى تاخد اكبر فائدة لجسمك من تقسيمة الوجبات وتفضل محافظ على نشاطك على مدار اليوم.
وعشان صحتك هدفنا، سلامتك هتقولك ازاي تقسم وجبات فطارك صح، وإيه الفوائد من تقسيم وجبة الفطار. 
اولا الوقت: تقدر تقسم وجبة الفطار على مدار ساعات مختلفة عشان تضمن توزيع الطاقة على جسمك بقيت اليوم. مثلا، تقدر تاكل الجزء الأول بعد المغرب، و بعدين وجبة خفيفة قبل التراويح، ويبقى اخر جزء من وجبة إفطارك بعد التراويح.
تاني حاجة التنوع في الوجبة: مهم جداً التنوع في وجبة الفطار عشان تاخد كل العناصر الغذائية الضرورية، زي البروتينات و الكربوهيدرات و المعادن. ده بيساعد على الشعور بالشبع و النشاط طول اليوم.
وبتيجي الفوائد من هنا لان هتلاقي صحتك احسن عشان في :
تحسن في الهضم: من خلال تقسيم وجبة الفطار هتلاحظ انك أخف على مدار اليوم وده هيشيل أي معاناة أو عدم إحساس بالراحة من علي جهازك الهضمي. 
تحسن نسبة السكر في الدم : تقسيم الوجبات بيمنع  ارتفاع السكر في الدم بعد الفطار فا بالتالي ده هيقلل نسبة الإصابة بمرض السكري . 
غير أن تقسيم وجبة الفطار كمان بتخليك شبعان لفترة أطول و بيقلل من إحساس الشراهة في الأكل. 
والاهم من كل ده إنك هتحافظ علي سلامة وصحة قلبك لانك هتمنع تراكم الدهون في الجسم و ده هيقلل من خطر الإصابة بأأمراض القلب.